"Apple” kompaniyasi o‘zining Kupertino shahridagi (Kaliforniya shtati) bosh qarorgohida yangi "iPhone 4S” smartfonini namoyish qildi. Ko‘pchilik kutganidek, yangi smartfon "iPhone 5” emas, balki "iPhone 4S” deb nomlandi.

"iPhone 4S”ning korpusi "iPhone 4” korpusi bilan bir xil, biroq yangi modelda ancha-muncha ichki o‘zgarishlar kiritilgan. Yangi "iPhone 4S” ikki yadroli A5 chipi asosida ishlaydi, ushbu chip hozirda "iPad 2” planshetlarida mavjud. Apparatning grafik tizimi unumdorligi, "Apple” vakilining so‘zlariga ko‘ra, "iPhone 4”ga qaraganda 7 barobar tezroq.

Yangi modelga 8 megapikselli orqa kamera o‘rnatilgan bo‘lib, u 1080p kengaytmali yuqori sifatli (HD) video tasvirga tushirish imkoniyatini beradi. "AirPlay” texnologiyasi esa, smartfondagi rasmni televizorga chiqarish imkonini beradi.

"iPhone 4S” smartfoni bir vaqtning o‘zida GSM tarmog‘ida ham, CDMA tarmog‘ida ham ishlay oladi. Eslatib o‘tamiz, Apple o‘tgan safar har ikkala standart uchun "iPhone 4”ning ikki xil versiyasini ishlab chiqqan edi. Smartfon HSDPA+ texnologiyasini qo‘llab-quvvatlaydi va bu ma’lumotlarni 14,4 Mb/s gacha tezlikda o‘tkazish imkonini beradi.

Apparatning yangi modeliga "Siri” funksiyasi biriktirilgan bo‘lib, bu foydalanuvchiga o‘zining telefoni bilan "muloqot” qilish imkonini beradi. Masalan, siz "Siri” funksiyasi yordamida telefoningizdan "Bugun ob-havo qanday?” deb so‘rasangiz, apparat ekranga ob-havo ma’lumotini chiqaradi. Hozircha ushbu funksiya ingliz, nemis va fransuz tillarida ishlaydi. Biroq, "Apple” keyinchalik unga boshqa tillarni ham qo‘shishni rejalashtirmoqda.

Xuddi "iPhone 4”ga o‘xshab, "iPhone 4S” ham oq va qora ranglarda ishlab chiqariladi. Apparat uch xil variantda – 16, 32 va 64 gigabayt ichki o‘rnatilgan xotira bilan chiqariladi. AQShda u "AT&T”, "Verizon” va "Sprint” aloqa operatorlari bilan ikki yillik shartnoma asosida mos ravishda 199, 299 va 399 dollar narzda sotiladi. Apparat 14-oktabrdan do‘konlarga sotuvga chiqariladi.

"Apple”, shu bilan birga, 8 gigabayt ichki xotiraga ega "iPhone 4” va "iPhone 3GS” smartfonlarini ham sotishda davom etadi. Bunda, "iPhone 3GS” ikki yillik shartnoma bilan bepulga, "iPhone 4” esa 99 dollar narxda sotiladi.

Bundan tashqari, "Apple” ushbu taqdimotda o‘zining "iPod” musiqa pleyerlarining ham yangilangan versiyalarini taqdim qildi. Bu boradagi batafsil ma’lumotlarni kompaniyaning rasmiy veb-saytidan topishingiz mumkin.