 Болливуднинг хушрўйи Айш иштирок
этаётган сўнгги биронта картина оммалашаётгани йўқ. Турмуш ўртоғи билан
бирга суратга тушган янги фильми "Raavan” ўзига хос бўлса-да, кенг омма
эътиборини қозона олмади. Маълумотларга қараганда, Айшвария Рай
навбатдаги картинада шундай рол ижро этганки, томошабинлар ҳайратга
тушиши ҳақида кўплаб ОАВ тинмай гапиряпти. Янги картина "Робот” деб
номланиб, унда Айшдан бошқа биронта таниқли актёрни учратмайсиз. Агар,
Болливудда ҳали робот аёл образи яратилмаганини инобатга олсак, бу
борада ўзбек киносида илғорлик бор. "Темир хотин”ни эсга олинг. Мана,
яқинда суратга олинган, "робот-қиз” Манзура яратган образ «Севгинатор»
ҳақиқий технологик картина бўлди. Ушбу фильмнинг иккинчи қисми ҳам
муваффақият қозонди. Агар, Айш ижросидаги фильмдан олинган суратларга
ҳам назар ташласак, ўзимизнинг "робот” Манзуранинг имижига жуда ўхшаш.
Озгина пичинг, озгина ҳазил билан айтганда, Рай Баччан Йўлдошевадан
илҳомланган кўринади. Кўрамиз, Болливуднинг "Робот”и қай даражада
шуҳрат қозонади?
"Ҳаётда ҳамма нарса бўлади” - Болливуд мегахити энди мультфильм тарзида!
Каран Жоҳар номини Болливудга
катта ҳарфлар билан битган энг омадли фильмларидан бири "Ҳаётда ҳамма
нарса бўлади”. Ўзбек томошабинларига бу картина ЎЗТВда тинимсиз намойиш
этилаверганидан ёд бўлиб кетган. Шохрух Хон ва Кажол жуфтлиги айнан шу
картинадан кейин Болливудда ҳам, бутун дунёда ҳам энг севимли жуфтлик
сифатида қабул қилингани сир эмас. Орадан ўн икки йил ўтиб, шу картина
яна томошабинлар ҳукмига ҳавола этилади. Бу гал Каран Жоҳар сал
бошқачароқ услубни танлади. Севимли фильмни мультфильм тарзида яратди.
Фильм устида бир йилдан ортиқроқ, салкам 100га яқин мутахассислар бош
қотирди. Энг қизиғи, мультфильм воқеалари Ерда эмас, балки ўзга
сайёрада кечади. Севимли актёрлар ансамблини эса бу гал фақат мультик
образлар орқали кўрасиз. Овоз эса ўша машҳурларнинг ўзига тегишли!
Афсус, бу картина ўзбек тилига ўгирилиб мухлислар ҳукмига тақдим
этилишини инобатга олсак, Шохрух Хон, Кажол ва Рани Мукхержиларнинг
образларига берган овозларидан баҳраманд бўла олмаймиз. Дарвоқе,
"Ромеонинг муҳаббат йўли” номли мультфильмни икки йил олдин "Yash Raj
Films» кенг оммага тақдим этганди. Бош қаҳрамонларга айни пайтда
Болливуднинг энг шов-шувли жуфтлиги Карина Капур ва Саиф Али Хон овоз
берганди. Холливуднинг йирик компанияларидан бири "Walt Disney
Pictures” продюсерлиги, 150 дан ортиқ мутахассисларнинг тинимсиз
ижодкорлигию меҳнати, машҳур жуфтликнинг дубляж маҳорати... уларнинг
ҳеч бири бу мультфильмни таназзул ботқоғига қулашидан асраб қола
олмади. Балки, Каран бу каби синовлардан тўғри тўғри хулоса чиқариб,
омад сирлари тенгламасини тузгандир?! Ким билади дейсиз, ҳаммаси
премьерадан кейин ҳал бўлади!
Жасур ҲАМРОЕВ
|
