|
Қадим замонлардан буён ҳозирга қадар аёллар ўзларининг
мафтункорликларини кучайтирувчи турли-туман усулларни излаб топишади.
Косметика – одамзотнинг энг буюк ютуғи деган фикрга қарши чиқадиган аёл
бўлмаса керак. Тўғри танланган пардоз воситалари ва тўғри макияж туфайли
кўпгина аёллар таниб бўлмас даражада ўзгариши ва дунёга қувонч
бағишлаган ҳолда, гўзалликларини намоён этиши мумкин. Бироқ макияж ва
косметика ҳамма вақт ҳам яхшими ва аёлларнинг макияж борасидаги
саъй-ҳаракатларини эркаклар қай даражада баҳолашади (ахир, бу ҳаракатлар
асосан айнан улар учун-да), деган саволни ўзимизга бериб кўрганмизми?
Маълумки, эркаклар кўзлари билан яхши кўради, аммо кўзлар қанча
бўлса, фикрлар ҳам шунча. Биз эркаклар орасида (23 дан 32 ёшгача бўлган
Тошкентда истиқомат қилувчи эркаклар) ўтказган кичик сўровнома
аёлларнинг макияжи ҳаммага ҳам бир хил ёқавермаслигини кўрсатди.
Эркакларнинг бир қисми «Аёлга макияж керакми?» деган саволга бир хил -
«Керак ва жуда зарур» деган жавобни беришди. Бунда сўровда қатнашган
эркакларнинг кўпчилиги ҳаммаси меъёрида бўлиши лозимлигини, яъни макияж
ҳаддан ташқари ёрқин бўлмаслиги кераклигини қайд этишди. Арт-дизайнер
Александр (27 ёш) унга «тўғри ёндошилган макияж» ёқишини айтди. «Тўғри
бажарилган макияж чеҳранинг гўзаллигига урғу беради. Шунингдек, у
нуқсонларни яшириши мумкин, кўп ҳолларда макияж кўримсиз қизни жуда
мафтункор қизга айлантиради». Унинг фикрича, қизлар ҳам «саришта» ва
«ўзига қараб юрадиган» йигитларни ёқтиришади, умуман олганда эса,
одамлар кишининг ташқи кўринишига ва ўзини қандай тутишига қараб хулоса
чиқаришади.
Искандар (26 ёш, кимёгар-технолог) ҳам қиз бола меъёрида ва дид
билан макияж қилиши кераклиги тарафдори. Бундан ташқари, унинг фикрича,
макияж барча қизларга эрталабдан жуда зарур. Шу билан бирга, у зарурат
бўлмаганида макияж қилмаслик ҳам мумкин деб ҳисоблайди.
Баъзи эркакларнинг аёллар юзидаги косметикадан кўнгли айнийди.
Хусусан, топ-менежер Озод (31 ёш) қизлар бўянмасдан, балки оламга
ўзларининг табиий гўзалликларини бахш этишлари керак деб ҳисоблайди.
Агар юзда макияж бўлса ҳам, у кўзга ташланмаслиги ва табиийга яқин
бўлиши лозим. У ўзининг рафиқасига юзда илғаб олиниши қийин бўлган
пардоз воситаларини сотиб олиб беришга ҳаракат қилар экан.
Шу билан бирга, ҳамма эркаклар ҳам қизларнинг юзига макияж керакми
ёки йўқми деган саволга бир хил маънода жавоб бера олмадилар. Ушбу
тенденция устун экани маълум бўлди. Дмитрий (25 ёш, дастурчи) бу саволга
қуйидагича жавоб берди. Унинг фикрича, «бу ерда вариантлар кўп: агар
қиз макияжни ҳаддан ташқари кўп қўйишга интилмаса, кўзга унчалик
ташланмайдиган ёқимли макияжни қилгани маъқул. Аммо шундай қизлар борки,
улар табиатан жуда чиройли, улар макияж ёрдамида етишмаётган
«гўзалликни» чизиб олишлари мумкин. Умуман олганда эса, ҳаммаси меъёрида
бўлгани яхши. Ёқтирадиган қизимни макияжсиз ҳам севаман» - дейди у.
Дмитрийнинг бу жавоби кўпчилик эркакларнинг макияж бўлиши керакми ёки
йўқми деган саволга жавобларини акс эттиради. Шу боис уни эркаклар
фикрининг моҳияти десак, адашмаймиз.
Хулоса сифатида шуни айтиш мумкинки, аёл эркакларнинг фикрига қулоқ
солса-да, у, биринчи навбатда, ўзи учун яхши қиёфада бўлиши керак. Бу
макияж билан бўладими ёки усиз – бу ҳар бир қизнинг шахсий иши.
СИЗНИ ФИКРИНГИЗ.....
|
