-Сизнинг даврингиз келгандай... бош ролда фақат Адиз ражабов!

-Ҳамма нарсанинг ўз вақти соати бор. Омадим кулганга ўхшайди! 

-Мухлисларингиз тобора ошиб бораётганини ҳис қиляпсизми?

-Ҳа. Барибир эътибор бошқача бўляпти. Комедия фильмлари орқали мухлисларимга ёқиш ёқмаслиги мени ўйлантириб қўйганди. Шукрки, яхши қабул қилишяпти.

-«Болливуд қироли» Шохрух Хонга тақлид қиляпсиз...

-Билмадим. Шохрух Хонни ҳурмат қиламан. Тақлид қилиш учун фанат бўлиш керак! Мен унинг ашаддий мухлиси эмасман! Ундан ҳеч нарса ўрганмаганман.

-Гонорарингиз ҳам ошиб қолгандир?

-Эл қатори. (кулади)

-Гонорарингиз ошиши машҳур бўлиб боришингиз билан боғлиқми?

-Ҳали анча бор оширишга. Секин очиляпмиз. Яхши актёр бўлиб етишиш учун камида 10-15 йил керак. Мен ҳали хом меваман! Сайқалланишим керак.

-Кетма-кет бош рол ижро этишингизга асосий сабаблар куйидагилардан қай бири бўлиши мумкин: гонорар ҳақининг мўътадиллиги, омад кулиб боққани, режиссёрлар Улуғбек Қодиров ва Фаррух Сойиповдан ранжиб қолишгани ва шу кабилар...

-Худонинг насиб қилгани. Тақдирнинг ишлари бу!

-Алишер Узоқовнинг қайси жихатларига тан берасиз? Унда сиз кўрган камчиликлар?

-Камчиликларини кўрмадим. Ҳар бир вазиятни юморга айлантира олишига тан бераман. Аслида шу хусусиятнинг ўзи бир истеъдод.

-Хуфёна тўйингиз бўлгани ростми?

-Йўқ. Тўйим бўлса албатта айтаман!

-Диана Ягофарова...айни пайтда хаёлингизга биринчи келган фикр кандай?

-Ярқ этган актриса.

-“Суперкелинчак”ка хавас қилганлар анча. У яратган образ каби қизга уйланишингиз мумкинми?

-Йўқ!

-Сўнгги марта қачон катта қарз олгансиз?

-Анча бўлди. 4 йил олдин. Бизнес учун олганман.

-Актёр сифатида сизни рад қилган ёки умуман ёқтирмайдиган яқин инсонингиз?

-Унақаси йўқ!

-Энг узоқ муддат ким билан телефон орқали гаплишингиз мумкин?

-Онам билан. Энг камида 25 дақиқа. 1,5 соат энг узоғи.

-Кимнидир телбаларча севганмисиз?

-(кулади). Ҳа десам ҳам бир бало, йўқ десам ҳам бир бало.

-Хоббингиз борми?

-Кино кўриб, дам олиш.

-Севги изҳорларини бир кунда неча марта қабул қиласиз?

-У даражада кўп эмас!

-Оилангиз хақида гапиринг...

-Онам- уй бекаси, дадам институтда ўқитувчи. Акам, укам, синглим, куёвим, кеннойим ва жияним. 

-Кимнинг ашаддий мухлисисиз?

-Менда ашаддийлик йўқ.

-Пушкиннинг шундай мисралари бор: “Охир деди, о, дўстим эзмалик кимга даркор, сен аҳмоқсан, бу эса асло янгилик эмас”. Шундай маънодаги жавоб билан кимгадир мурожаат қилганмисиз?

-Энди бўлмаса, ҳалигача йўқ!

-Қайси соҳадаги қизларга уйланмаслигингиз мумкин?

-Қийин савол... рашким баланд, шунинг учун актрисага ва қўшиқчига уйлана олмайман.

-Қайси ролингизни бачкана деб ҳисоблайсиз?

-Бу савол менга эмас. 

-Қайси пайтларда касбингиздан афсусланасиз?

-Ҳеч қандай фикр келмаяпти...

-Кези келиб, фарзандингиз ҳам отаси изидан боришини истайсизми?

-Йўқ. Истамасдим. Юки оғир.

-Шахсан мени “9 район” ва “Подмена” фильмлари қаттиқ таъсирлантирди. Сиз янги фильмлардан қай бирини мақтай оласиз?

-Менга ҳам “9 – район” ёқади. Жонни Деппнинг сўнгги фильмлари ҳам.

-Сиз учун идеал бўлган аёл...

-Онам.

-Мактаб пайтида қайси актёрнинг мухлиси эдингиз?

-Самандар Ҳамроқуловнинг диплом спектаклини ТВда кўриб, унга ҳавас қилгандим.

-Яқин маслаҳатдошингиз ким?

-Онам. Ҳар бир ишда у киши билан маслаҳатлашаман.

-Ҳар гал бухорога, уйингизга борганда нима олиб борасиз-у, нима олиб қайтасиз?

-Йулдан “самарканд нон” оламан, уйдан қайтаётганимда шўрданак оламан. Ўртоқларим яхши кўради.

-Нимадан воз кечолмайсиз?

-Виждонга қарши боролмайман. Касбимдан эса воз кечолмайман.

-Тушларингизга ишонасизми?

-Ишонаман. Яқинда туя кирганди, тушимга. Хосиятли дейишади. Омадим кулиб боқди!

-Ўзингиз қай тарзда ва ким билан фотосуратга тушишни орзу қиласиз?

-Ўзим тарихий ролларда, асосан, салбий образларда фотосуратга тушишни хоҳлардим. Алишер Узоқов билан суратга тушгим келади. Бу жуда қизик бўлса керак. 

-Дўстларингиз сотқинлик қилганми?

-Йўқ! Шукрки бўлмаган.

-Ҳаётда ижарада яшаётганлигингизни қай даражада англайсиз?

-Бу ҳақда кўп ўйлайман. Меҳмонмиз, бу дунёга! Яхшилик қолиши керак, ҳар биримиздан. Барибир бу дунёни тарк этамиз. Ёмонлик қилиб ҳам ўтади инсон... бироқ, бировнинг кўнглини олиб ўтган яхши. 

                                                                        Жасур ҲАМРОЕВ