Дарко Маркович: «Баҳорда бетон устида футбол ўйнагандек бўлдим»

2008 йил "Пахтакор" жамоаси сафига келиб қўшилган болқонлик Дарко Маркович, бугунги кунда жамоа мухлисларининг ёқимтойига айланиб улгурди.

- Дарко, бу ерда қанчадан бери ўйнаб келяпсан ва Черногориядаги клубинг тўғрисида нима дея оласан?
- «Пахтакор»га келгунимга қадар Черногориянинг «Будучность» жамоасида ўйнаганман. Собиқ клубим Черногория миллий чемпионатининг биринчи ғолибига айланди ва мен Европа чемпионлар Лигасида тўп тепдим. Ўшанда биз Литванинг «Каунас» жамоасини енгдик, лекин навбатдаги раундда Шотландия гранди «Глазго Рейнжерс»га икки ўйин натижасига кўра имкониятни бой бердик. Ўша мавсумдан кейин «Пахтакор»дан таклиф тушди ва мен Ўзбекистонга келдим.

- Янги жамоа қандай таассурот қолдирди?

- Жуда яхши. Бу ерда ҳамма ишлар юқори савияда йўлга қўйилган. Барча жамоанинг муваффақияти йўлида бирдек тер тўкади. Ўзбекистон муҳитига мослашиб олишимда бир неча йилдан бери «Пахтакор»да ўйнаб келаётган футболчилар катта ёрдам беришди. Легионерлар билан муносабат ҳам ижобий. Ҳозир ҳеч ким ўзини жамоада бегона сезмайди.

- Рус тилида эркин гаплашяпсан. Ўзбек тилида сўзлаш қобилиятингни қай даражада деб биласан?
- Ўзбекчада гаплаша олмайман, лекин кўп сўзларни тушунаман. Албатта, машғулотлар ва ўйин жараёнида ишлатиладиган сўзлар буларнинг асосий қисмини ташкил этади.

- Намойиш қилаётган ўйинингдан қониқяпсанми?
- Ўтган йил кўпроқ голлар ургандим. Бу мавсум унчалик сермаҳсул ўйнай олмаяпман, лекин мен майдонда марказда ҳаракат қиламан. Энг муҳими, «Пахтакор»нинг ғалабаларига қўлимдан келганча ҳисса қўшяпман. Бир неча кун олдин бу ердаги биринчи совринимни қўлга киритдим.

- Нима учун жамоа иккинчи ўринда боряпти? Бунинг сабаблари ҳақида батафсил тўхталиб ўтсанг.
- Биринчи навбатда рақибларнинг «Пахтакор»га қарши жуда жиддий қаршилик кўрсатишларини таъкидлаб ўтган бўлардим. Айниқса, сафардаги учрашувларда бу ҳолат яққол кўзга ташланади. Лекин ўша жамоалар бошқа пешқадам жамоалар билан беллашувларда унчалик фаоллик кўрсатишмайди. Шу мени ҳайрон қолдиради. Бундан ташқари, майдонларнинг ёмон ҳолатда эканлиги ва бизга қарши рақибларнинг тўлиқ ҳимояда ҳаракат қилишлари муаммо яратади. Чемпионатнинг дастлабки турларида худди бетон устида футбол ўйнагандай бўлдим. Бу биз сафарда ўйнаган жамоалар майдонининг умуман талабга жавоб бермаслиги билан боғлиқ эди. Фақат мавсум ўрталарига келибгина майдонлар яхши ҳолатга келади.

- Бу ерда рақобат юқорими?
- Албатта. Агар ўзингни бир оз бўш қўйсанг, заҳирадан ўрин олишинг ҳеч гап эмас. Ҳар бир чизиқда бир-бирига кескин рақобат қила оладиган иккитадан футболчи жамланган.

- Жамоа кубокни қўлга киритди. Энди кейинги учрашувларга тайёргарлик қандай бўлади?
- Тайёргарлик одатдагидек бўлади, лекин руҳий жиҳатдан ўзига келиб олиш қийин. Ҳар доим бирор муваффақиятга эришилгандан кейин руҳий тарафдан қайта тикланиш муаммо туғдиради.

- Қайси жамоада ўйнаш сенинг орзуинг?
- «Барселона»да. Болалигимдан ушбу клубга мухлислик қиламан ва ёшликда Хосеп Гвардиола энг ёқтирган футболчим бўлган. Унинг қўл остида бир кун бўлса ҳам машғулотларда қатнашишни орзу қиламан.

- Хориж чемпионатларини кузатиб борасанми?
- Ҳа, доимий тарзда. Европадаги кучли биринчиликлардан ташқари Бразилия, Аргентина, Япония ва Жанубий Корея биринчиликларини ҳам имкон қадар кўриб боришга ҳаракат қиламан.

- Бош мураббий ҳақида нима дея оласан?
- Виктор Жалилов ўтган мавсумдан буён жамоага бошчилик қилиб келяпти. Ундан олдин ҳам у мураббийлар штабидан жой олганди. Машғулотларда жуда талабчан. Бошқа пайт эса у билан бемалол суҳбатлашиш мумкин.