Мақолани расмий хабар билан бошлайман.
«Ўзбекистон кубогининг «Пахтакор»-«Бунёдкор» учрашуви қайта ўтказилмайди. Ҳаттоки бу ўйин натижаси қайта кўриб чиқилмайди ҳам. Иккинчи даврада «Пахтакор» сафига қўшилган Рўзим Аҳмедов эса 4 та сариқ карточка туфайли битта ўйиндан иборат дисквалификацияни Наманганда бўлиб ўтган «Навбаҳор»-«Хоразм» учрашувида ўтади». Бу хабарни кеча менга ЎзПФЛ матбуот хизмати вакили Алим Арифов телефон орқали етказди. Ушбу хабар бугун ПФЛнинг расмий сайтида ҳам чиқиши керак. «Кун мавзуси»га долзарб мавзу қидираётган эдим. Мавзунинг ўзи оёғимнинг тагидан лоп этиб чиқиб қолди. Шу кунларда бундан ортиқ оммавийлашган мавзунинг ўзи бўлмаса керак. Бугунги таҳлилим орқали ушбу мавзуга ниҳоят «точка» қўямиз, деган умиддаман.
Душанба куни ҳамкасбим Қаҳрамон Асланов «Назарий максимум ёхуд "завуч"ларга қойил!» номли мақола ёзганди, худди «заказ» қилинганидек, орадан бир кун ўтиб, ПФЛда тақвимдаги навбатдаги ўзгаришлар ҳақида маълумот берилди. Бугун муҳокама қилмоқчи бўлган масала ҳам бевосита ПФЛга боғлиқ. Умид қиламан, баъзи танқидлар учун ПФЛда фаолият юритаётган дўстларимиз биздан хафа бўлишмайди. Мақсадимиз ўзбек футболининг ривожи учун хизмат қилиш экан, ривожланиш учун тўсқинлик қиладиган ўзбекчилик, юзхотир каби иллатларни йиғиштириб қўйишимиз керак.
Хуллас, шанба-якшанба кунларидан бери бу мавзу ҳақида гапирилавериб, воқеанинг барча икир-чикирлари ёд бўлиб кетган бўлса-да, уни яна бир марта эслатиб ўтаман.
Маълумки, Рўзим Аҳмедов биринчи даврани тўлиқ «Хоразм» жамоаси сафида ўтказиб, тўртта сариқ карточка «ишлаган» (2-тур: «Хоразм»-«Сўғдиёна», 10-тур: «Шўртан»-«Хоразм», 12-тур: «Хоразм»-«Андижон», 15-тур: «Хоразм»-«Навбаҳор»). Профессионал футбол лигаси регламентига кўра, тўртта огоҳлантиришга эга бўлган футболчи чемпионат ёки мамлакат кубоги ўйинларининг навбатдаги ўйини қайдномасига киритилишга ҳақли эмас.
Бу ҳақда мусобақаларни ўтказиш регламентининг 4.26-бандида қуйидагича ёзиб қўйилган.
«4.26. За внесение в протокол матча неоформленного в установленном порядке (кроме случаев, предусмотренных в п. 4.16) или дисквалифицированного футболиста команде засчитается техническое поражение и на клуб налагается штраф в размере 1.000.000 сум, а команде сопернице присуждается техническая победа. При этом, голы забитые в этом матче, аннулируются, полученные предупреждения и удаления остаются.
За повторный подобный факт команда после согласования с ФФУ и по решению с ПФЛУз снимается с соревнований».
Таржимаси: «4.26-банд. Ўйин қайдномасига ўрнатилган тартибда расмийлаштирилмаган (4.16-бандда кўрсатилган ҳолатлар бундан мустасно) ёки дисквалификация қилинган футболчини киритганлик учун жамоага техник мағлубият ёзилади ва 1.000.000 сўм миқдорида жарима белгиланади, рақиб жамоага эса техник ғалаба ёзилади. Бу ҳолда, ўйинда киритлган голлар бекор қилинади, огоҳлантиришлар ва четлатишлар ўз кучини сақлаб қолади.
Энди регламентнинг 6.12-бандига мурожаат қиламиз.
«6.12. Оформления заявочной документации для клубов высшей и первой лиг прекращается за два календарных дня до начало чемпионата и первенство. Дозаявки начинаются во второй трансферный период, т.е., после окончание первого круга чемпионата, первенство и прекращаются за два дня до возобноления чемпионата, первенства, соответственно после летнего перерыва. В течения одного спортивного сезона футболист можеть быть заявлен для участия в соревнованиях не более чем за два клуба».
Таржимаси: «6.12. Олий ва биринчи лига жамоалари учун заявка ҳужжатларини расмийлаштириш чемпионат, биринчилик бошланишига икки календарь кун қолганда якунланади. Қўшимча заявка эса иккинчи трансфер даврида бошланади, яъни, чемпионатнинг биринчи давраси якунланиши билан бошланади ва ёзги танаффусдан сўнг, чемпионат давом эттирилишидан икки кун аввал тугайди. Футболчи мусобақаларда иштирок этиш учун бир спорт мавсумида иккитадан ортиқ клубда заявка қилиниши мумкин эмас».
Хабарингиз бор, Ўзбекистон чемпионатининг 2-давраси 7 август куни бошланди («Пахтакор» ва «Бунёдкор» клублари учун эса 4 август куни). Демак, «Пахтакор» ва «Бунёдкор» учун «дозаявка» 2 август куни, бошқа жамоалар учун эса 5 август куни ўз ниҳоясига етган. Рўзим Аҳмедов эса 7 август куни «Пахтакор»га заявка қилинган. Демак, ПФЛнинг ўзи регламентнинг 6.12-бандини қўпол равишда бузган.
Тушунамиз, «Пахтакор» Зайниддин Тожиевни Хитой клубига ижарага бериб юборгандан кейин ОЧЛда яхши ҳужумга эҳтиёж сезмоқда. Бу эҳтиёж Рўзим Аҳмедов ёрдамида қондирилишга ҳаракат қилинди. Агар «Пахтакор» раҳбарияти ўйинчини бироз олдинроқ заявка қилганида ёки заявка муддати тугагани учун ПФЛ Рўзим Аҳмедовнинг «дозаявка» қилинишига рухсат бермаганида ҳаммаси жойида бўларди. «Пахтакор» айтиши мумкин, Рўзим Аҳмедов дисквалификацияни Намангандаги ўйин («Навбаҳор»-«Хоразм»)да ўтаб бўлган, деб. «Бунёдкор» айтиши мумкин, битта футболчи битта даврада иккита клубда ўйнаши мумкин эмас, деб. Ва ҳар иккала томон ҳақ бўлади. Битта қоиданинг бузилиши мана шундай чигал вазиятнинг юзага келишига олиб келди. Аслида «Пахтакор» Р.Аҳмедовни 2 августгача заявка қилиши ва у 4 август куни «Шўртан» билан бўлган баҳсни ўтказиб юбориши керак эди.
Ушбу муаммони пайдо бўлишида Аҳмедовнинг «дозаявка»сига ёрдам берган ПФЛнинг ҳам, ўйинчининг сариқ карточкасини ҳисобламасдан уни протоколга киритган «Пахтакор» раҳбариятининг ҳам айби бор. Бўлар иш бўлди. Агар ПФЛ ўйин натижасини бекор қилса ёки учрашувни қайтадан ўтказса, бундан ортиқ шармандалик бўлмаса керак. Бу оддий чемпионат ўйини бўлганда ҳам бошқа гап эди. Ахир бу кубок финали-я! Бекорга бутун дунёга шарманда бўлганимиз қолади. Фақат ПФЛ, жамоаларимиз учун ушбу ҳолат сабоқ бўлиб, бошқа бундай ҳолатнинг юзага келишига йўл қўймасдан, регламент асосида иш юритилса бўлгани!
