Nihoyat, pop-musiqa qiroli Maykl Jeksonning qaerga ko‘milishi ma’lum bo‘ldi. Qo‘shiqchining jasadi Los-Anjelesning “Forest-Loun” qabristoniga dafn etiladi. Ed Uinterning so‘zlariga qaraganda, qo‘shiqchining toksikologik ekspertiza uchun olingan miyasi oilasiga bir necha haftadan so‘ng qaytarildi. Ammo ekspertiza natijalari keyinroq e’lon qilinarkan. Bundan avval Jeksonning qarindoshlari uni qaerga dafn etish masalasida kelisha olishmayotgandi. Akasi Jermer “Neverland” bog‘idan qabr qazish kerakligini uqtirsa, bu qaror Mayklning onasiga ma’qul kelmadi. 79 yoshli Ketrin Jeksonning fikri hal qiluvchi bo‘ldi. Jeksonning qarindoshlari qabriston ma’muriyatiga dafn uchun kerakli barcha hujjatlarni topshirib bo‘lishdi. Qo‘shiqchi Klark Geybl, Uolt Disney, Teodor Drayzer, Nat King Koul, Xamfri Bogart singari madaniyat arboblarining yonida mangu orom topadi. Mish-mishlarga qaraganda, qo‘shiqchining qarindoshlari u bilan tug‘ilgan kuni — 29 avgustda xayrlashish niyatidalar.
