Payg’ambarimiz (s.a.v.) buyurdilarki:

Kimki halol kasb qilib, Olloh rizosi uchun bir dona xurmochalik sadaqa bersa, (Olloh halol kasbdan topilgan boylikdan qilingan sadaqanigina qabul etishini buyurgan) Olloh uni bajonidil qabul etadi. Sizlar bir luqma sadaqa qilsangiz, uni Uhud tog’iday qilib qaytaradi.

Qur’oni Karimning “Baqara” surasi, 276-oyatida: “Olloh sudxo’rlikning (foydasini) yo’q qiladi va sadaqalarning (foydasini) ziyoda qiladi”, deb marhamat etiladi.

Rasululloh shunday marhamat qildilar: “Sadaqa (zakot) molni kamaytirmaydi. Kim biron odamni afv etsa, Olloh uni boshliq qiladi. Kim Olloh uchun tavoze ko’rsatsa, Olloh uning darajasini baland qiladi. Suv olovni o’chirgani kabi, sadaqa (zakot) ham xatolarni o’chiradi. Qiyomat kunida, insonlararo hukmlar oxiriga yetguncha har kim o’z sadaqasining soyasida bo’ladi”.

Ul muhtaram zot yana:

— Sendan bir narsa tilaganni quruq qaytarma. Tirnoq qadar bo’lsa ham, biron narsa ber! — deb ta’kidladilar.

Abu Homid G’azzoliy aytadi: “Ollohning soyasidan bo’lak hech qanday soya bo’lmaydigan kunda, Olloh yetti toifa kishiga o’z soyasidan joy beradi. Ulardan bir toifasi biron narsa sadaqa qilib, buni hech kimga bildirmagan, ya’ni, o’ng qo’lining berganini chap qo’li bilmagan kishilardan iborat.

Yaxshiliklar yomonliklarni o’nglab yuboradi. Yashirincha berilgan sadaqalar Ollohning g’azabini so’ndiradi. Qon-qarindoshlar aro rahm-oqibat va mehribonlik umrni uzaytiradi. Har bir yaxshilik — sadaqadir. Bu dunyodagi yaxshilik ahllari oxiratda ham yaxshilik ahllari bo’lib qoladilar. Bu dunyodagi yomonlik ahllari oxiratda ham yomonlik ahllari bo’lib qoladilar. Jannatga birinchi bo’lib kiruvchilar, yaxshilik ahllaridan bo’lgan kishilardir”.

Payg’ambarimizdan so’radilar:

— Sadaqa nima, ey Ollohning Rasuli?

Rasululloh (s.a.v.) buyurdi:

— Qavatlamadir. Ollohning nazdida oshig’i bilan qaytarilishi kerak bo’lgan narsadir, — Olloh Rasuli bu gapdan keyin mazkur oyatni o’qidilar: — Ollohga qarzi hasana (ixtiyoriy qarz) beradigan kim borki, (Olloh) unga bir necha barobar qilib qaytaradi” (“Baqara” surasi, 245-oyat).

Yana “Baqara” surasining 271-oyatini qo’shimcha qilib dedilar:

— Agar sadaqalarni oshkora holda bersangiz, juda yaxshi. Va agar maxfiy qilib, faqir-kambag’allarga bersangiz — bu o’zingiz uchun yanada yaxshiroqdir. Va qilgan gunohlaringizga kafforat bo’ladi! Olloh qilayotgan amallaringizdan xabardordir.

Qiyomat kuni bo’lganda Olloh buyuradiki:

— Ey, Odam o’g’li, men xavotirlandim, ko’rgani kelmading ham!..

Bandasi so’raydi:

— Seni qanday ko’rgani boray? Sen butun olamning egasisan?!

Olloh buyuradi:

— Ko’rdingmi: falon bandam xastalandi. Ko’rgani bormading. Ko’rgani borsang, men uning yonida bo’lishimni bilmasmiding!..

Yana Olloh buyuradi:

— Ey, Odam o’g’li, senga qanchadan-qancha ne’matlar berdim. Seni yedirdim. Sen menga hech narsa yedirmading...

Bandasi so’raydi:

— Seni qanday yediray, ey Rabbim? Sen olamlarning Rabbisan. Yemak-ichmakdan munazzahsan (poksan, xolisan)!

Olloh buyuradi:

— Bilmaysanmi, falon bandam seni yedirdi, sen unga yedirmading. Agar bir yo’qsulni to’ydirgan bo’lsayding, uning yonida meni topar eding.

Olloh yana buyuradi:

— Ey Odam o’g’li, men senga suv berdim. Sen menga hech suv bermading!..

Bandasi so’raydi:

— Sen odamlarning Rabbisisan, Senga qanday suv beraman?!

Olloh buyuradi:

— Falon bandam chanqog’ingni qondirdi. Sen yo’qsulning chanqog’ini bosmading. Agar yo’qsulni qondirsayding, hozir uni mening yonimdan osongina toparding!..