| Статистика |
XOZIR SAYTDA 1 MEXMON 1 FOYDALANUVCHI 0 |
|
 | |  |
| Главная » 2009 » Июль » 13 » Makka Madina
|
|
IKKI MUQADDAS SHAHARLARNING FAZILATI
Albatta, biror joy fazilatli va muqaddas bo‘lishi uchun u yerda uni muqaddaslashtirishga arziydigan sabab bo‘lishi shart va bu shart Allohning nazdida ham muqaddas sanalishi lozim. Ana shunday muqaddas makonlardan biri Makka va Madina shaharlaridir. Makkai mukarramada Allohga ibodat qilish va butun olamlarga hidoyat bo‘lishi uchun qurilgan birinchi masjid — Baytulloh bordir. Qolaversa, Masjidul Haromda o‘qilgan bitta namoz boshqa masjidlarda o‘qilgan yuz mingta namozning savobi darajasidan ulug‘dir. Qur’oni karimda Alloh taolo bu shahar bilan qasamyod etgan.
Abdulloh ibn Abbos (r.a.)ning rivoyat qilishlaricha, Rasululloh (s.a.v.) Makkai Mukarramani fath qilgan kunlarida: “Albatta, Alloh bu yurtni osmonlaru yerni yaratgan kunidayoq hurmatli qilgan. U Allohning hurmati ila qiyomat kunigacha Haromdir. Mendan oldingilar hech biriga bu yerda urush qilish halol bo‘lmagan. Menga ham faqat ushbu kunning ozgina muddatiga halol qilindi, xolos. Bundan so‘ng, u yana Allohning hurmati ila qiyomat kunigacha Haromdir. Bu yerning tikoni yulinmaydi, ov hayvonlari hurkitilmaydi. Tushib qolgan narsani o‘z egasidan boshqa odam olmaydi”, — deganlar (Muttafaqun alayh).
“Ekin o‘smaydigan vodiy” haqida Ibrohim (a.s.) Alloh taologa duo qilganlar. Ushbu duoni qabul qilib, Alloh taolo Makkai mukarramani tinchlik shahriga aylantirdi. Qur’oni Karimda bu diyor omonlik diyori ekanligi qayta-qayta ta’kidlanadi. Bundan tashqari uning barcha musulmonlar uchun ziyoratgoh ekanligi ham bayon qilingan.
Muqaddas shaharning yana bir fazilati shundaki, unga kelgan har qanday kishi u yerda kamtarin va xokisor bo‘lib yurishga moyil bo‘lib qoladi. Qur’oni Karimda bu shaharning nomi “Bakka” deb zikr qilingan. U “taqillatib urmoq” yoki “bo‘yinga urmoq” degan ma’nolarni anglatadi. Darhaqiqat, kishi o‘z yurtida qanchalik mutakabbir va g‘urur bilan yurgan bo‘lsa ham, Makkaga kelgandan so‘ng o‘z gunohlarini e’tirof etib, Alloh taologa yanada ko‘proq iltijo qilishga o‘tadi.
Ma’lumki, Ibrohim (a.s.), Hojar va Ismoil alayhissalomlar bu yerda og‘ir sinov va imtihonlarni boshdan kechirganlar. Bu muqaddas shaharning tosh-tuproqlari o‘sha voqealarga guvoh bo‘lgan. Suyukli Payg‘ambarimiz Muhammad (s.a.v.) o‘sha yerda tavallud topganlar. Dinimizning asosi, Parvardigorning kalomi Qur’oni Karim ham o‘sha yurtda nozil bo‘la boshlagan. Bularning barchasi Makkai mukarramaning qadr-qiymatini yanada oshiradi.
Muqaddas makonlardan yana biri Madinai munavvaradir. Asl nomi “Yasrib” bo‘lgan, keyinchalik unga “Madinatu Rasulillah”, ya’ni “Rasulullohning shahri” deb nom berilishining o‘zi uning fazilati qay darajada yuksak ekanligini ko‘rsatadi. Zero, butun olamlar faxri bo‘lgan Muhammad alayhissalomga hayotlik vaqtlarida boshpana bergan yurt, vafotlaridan so‘ng to ro‘zi qiyomatgacha o‘z bag‘riga olgan tuproq, albatta, muqaddasdir. Madinai munavvaradan yetishib chiqqan buyuk olim Imom Molik (r.h.) Madina ko‘chalarida yurganlarida ulovga minmas edilar. Buning sababi so‘ralganda: “Men Allohning Payg‘ambari (s.a.v.) yotgan tuproqlarni ulov tuyoqlari bilan bosishga Alloh taolodan uyalaman”, — deb javob berganlar. Islom tarixida dastlabki qurilgan “Qubo” masjidi bor. Uning fazilati haqida Qur’oni Karimda bayon qilingan. U masjid ham, uning ahli ham Alloh taoloning maqtoviga sazovor bo‘lgan.
Masjidun nabaviyda o‘qilgan namoz juda fazilatlidir. Zero, Rasululloh (s.a.v.): “Mening bu masjidimda o‘qilgan bitta namoz, Masjidul Haromdan tashqari boshqa masjidlarda o‘qilgan mingta namozdan yaxshiroqdir”, — deganlar(Muttafaqun alayh).
Shuningdek, ko‘pgina sahobalar, xususan, Xulafoi roshidinlar, Uhud jangida halok bo‘lgan shahidlarning muborak jasadlari ham Madinai munavvaraga dafn qilingan. Musulmonlar namozlarini Ka’ba tomonga qarab o‘qishlari haqidagi oyatlar nozil bo‘lgan va o‘sha vaqtda namozni ado etish asnosida bu buyruqqa itoat etib, Ka’baga yuzlangan jamoatning masjidi “Masjidi Qiblatayin” ya’ni “Ikki qibla masjidi” ham Madinai munavvaradadir.
Alhamdulilloh, bugungi kunda O‘zbekiston fuqarolari ham istiqlol sharofati bilan bunday muqaddas joylarni ziyorat qilish sharafiga muyassar bo‘lmoqdalar.
Alloh taolo barchalarimizga ana shunday muqaddas joylarga borishni nasib etsin. (Omiyn).
Muhammadnazar QAYUMOV,
|
|
Категория: ISLOM |
Просмотров: 2353 |
Добавил: JAVOXIR
| Рейтинг: 0.0/0 |
Добавлять комментарии могут только зарегистрированные пользователи. [ Регистрация | Вход ] | |
|
|
