"АЛИЯ" КИМГА НИМА БЕРДИ

“Алия”нинг сўнгги қисмлари тасмага туширилаётган чоғда бош қаҳрамонлар – Синан, Алия ва шифокор Денизни ижро этган санъаткорлар билан учрашиш “Sabah” газетаси мухбирига анча қийин кечди. Сериал режиссёри Қудрат Сабанжи уни суратга олиш майдончасига киритмагач, туркиялик ҳамкасбимизнинг Ҳалид Эргенч, Санем Челик ва Нежат Ишлерни ташқарида кутишдан бошқа чораси қолмади. “Мажбурий кутиш” унга “Алия” билан боғлиқ ноёб сирларни тақдим этди. Бу эса “Алия” кимга нима берди?” мақоласининг ёзилишига сабаб бўлди. 



“Энг аввало оилам ва яна оилам” 

Шифокор Денизни ижро этган Нежат Ишлер оила масаласига жиддий эътибор берар экан.

Туғилган йили: 1972.

Туғилган шаҳри: Истанбул.

Маълумоти: Мимар Синан университетини тамомлаган.

- Катта оилада вояга етганман. Ҳар байрамда хонадонимиз тўлиб кетарди. Мен бир чеккада опам билан меҳмонларнинг суҳбатини тинглаб ўтирардим. Мазмунли суҳбатлар менга ҳаётни севишга ўргатди. 

- Аввалдан севги масаласига жиддий қараганман. Чиройли кўринган ҳар қандай қизга севги изҳор қилавермайман. Бироқ 30 ёшдан кейин, барибир, эркак кишига бир ҳамроҳ зарурлигини англадим. Эркак зоти эрталаб уйғонганида, “Чой ичасизми ёки кофе?”, деган лутфга зор экан. 

- Ҳар қандай вазиятда ҳам оиламни биринчи ўринга қўяман. 

Хўш, Алия Нежат Ишлерга нима берди? Бундоқ олиб қараганда, ҳеч нарса. Лекин “Sabah” газетасининг мухбири унга бу ижро нима берганлигини билиб олди: хорижий кинокомпаниялардан таклиф.

 

Туркан Шорайнинг эътирофи 

Алияни ижро этган Санем Челик шу ролидан кейин турк актрисаларининг “Султони” Туркан Шорайнинг эътиборига тушди.

- Мен одатда сериалларни унчалик ҳам ёқтирмайман, - деди Туркан Шорай. – Аммо “Алия” менга ёқди ва энди қўрқмасам ҳам бўлади. Негаки, мен шу сериални томоша қилиб, ворисим борлигига ишонч ҳосил қилдим. Санем Челик ҳақиқатдан ҳам истеъдодли актриса. 

Бу ҳақда Санем Челикнинг ўзи нима дейди? 

- Туркан Шорайнинг баҳосини газета орқали ўқиб, аввалига ишонмадим. Кейин ўзи билан учрашишга ҳаракат қилдим. Бироқ иш тиғиз бўлгани учун телефонда суҳбатлашдим. Ўзидан яна бир бор бу гапларни эшитиб, ҳаяжонландим.

Санем Челикни қандай эркаклар ўзига мафтун этади? 

- Менга Синанга ўхшаган эркаклар ёқмайди. 

- Агар имкони бўлса, Синаннинг ёнига қайтармидингиз?

- Сериални томоша қилганларнинг аксарияти Синаннинг ёнига қайтишим кераклигини айтишмоқда. Кимдир эса “хиёнаткор эр билан яшамаслик керак”, демоқда. Ўзим фарзандларимнинг бахти учун ҳам Синаннинг олдига қайтган бўлардим. 

- Бўш вақтингизда нима билан шуғулланасиз?

- Пианино чаламан, расм чизаман ва қўшиқ куйлайман.

 

Унинг ҳақиқий “Алия”си Мерич 

Суратга олиш ишлари якунлангач, ташқарига биринчи бўлиб “Даврон”дан “Синан”га айланган Ҳалид Эргенч ва унинг синглиси Мерич ролини талқин этаётган Эмел Гўлгечен чиқишди. 

Санъат ва ҳаёт: - Ҳаммамиз болалигимизда турли ўйинлар ўйнаганмиз. Кимдир “меҳмон-меҳмон” ўйинида ота-она, кимдир эса бола ролини ўйнаган. Аммо оналар “Болалар овқат тайёр”, дейиши биланоқ, ҳамма ўз уйига чопган. Санъат ҳам шундай. Режиссёр “Мотор”, дейиши билан ролимизга киришамиз. “Стоп”, деганда тўхтаймиз.

“Алия”даги роли ҳақида: - Синанга ачинаман. Унинг ҳаёти ҳавас қилгулик эмас. Агар мен ўрнида бўлганимда, ҳаётимга биринчи ўринда ёлғон ва алдовни аралаштирмасдим. 

Ўзи ҳақида: - Мен табиатан романтикман. Табиат қучоғида ширин орзулар суришни ёқтираман. Шу пайт ёнимда севгилим бўлиб қолса-ю, майин бир мусиқа таралса. 

Николас Кейж ҳақида: - Мени Голливуднинг машҳур актёри Николас Кейжга ўхшатишларини у қадар ёқтирмайман. Бу мен – Ҳалид Эргенчман.

Оила қандай бўлиши керак?: - 35 га киряпман. Шу пайтга қадар уйланмаганлигимнинг сабаби: бировга ишонишим жуда қийин, яна инсоний муносабатни биринчи ўринга қўйганимдир. Мисол учун, сиз оила қуришни жондилдан истаяпсиз, лекин қаршингиздаги инсоннинг хоҳиши йўқ. Ёки аксинча. Икки томон ҳам турмуш қуришни хоҳласагина, оила мустаҳкам бўлади.

“Синан” оға билан қилинган қисқагина суҳбатдан сўнг унинг муҳаббатини ким қозонганлиги маълум бўлди. “Алия” сериали Ҳалид Эргенчга Эмел Гўлгеченни берди”, деб ёзади туркиялик ҳамкасбимиз. Ҳалид Эргенч сўзи охирида: “Оилам бўлишини, Арда ва Айше сингари фарзандлар кўришни истайман”, деган.