Ёз фасли Европа футболида мусобақаларсиз ўтса-да, жуда қизғин кечади. Барчанинг эътибори транфер бозорига қаратилади. Клубини алмаштирган футболчилар муҳокама қилинади, қайси клуб қайси футболчи билан кучая олиши таҳлил қилинади ва ҳоказо. Келинг, биз ҳам дарчадан секин бошимизни суқайлик-да, бу тиниб тинчимаслар нима қилаётганликлари ҳақида маълумот йиғайлик:

- Channel4 нинг хабар беришича, “Рома” клуби Бразилия терма жамоаси ва “Коринтианс”нинг чап қанот ҳимоячиси Сантосга харидор. Футболчининг агенти римликлар унга таклиф билан чиқишгани ҳақида хабар берди. Сантоснинг Римга кўчиб келиши 5 миллион фунт стерлинг атрофида баҳоланмоқда. Эслатиб ўтамиз, футболчига шунингдек, “Ювентус” ва “Милан” каби грандлар ҳам даъвогарлик қилишмоқда.

- ПСЖ клуби мураббийи Антуан Комбуаре “Интер”нинг франциялик ярим ҳимоячиси Патрик Виейра ватанига қайтиш истагида эканлигини маълум қилди. Бунинг асосий сабаби навбатдаги жаҳон чемпионати олдидан кўпроқ майдонга тушиш, деб изоҳлади мураббий. Виейранинг асл ватани қаер эди ўзи? Эсларингдами?

- Бразилия ёшлар терма жамоасида 11 маротаба майдонга тушиб улгурган Дуглас Коста Испания грандлари ва “Манчестер Юнайтед” томонидан талаш бўлмоқда. Футболчининг агентининг айтишича, Дуглас 20 миллион фунтга баҳоланмоқда экан ва уни қўлга киритиш имконияти “МЮ” да баландроқ. Ахир роса чўнтаги қаппайиб турибди-ку инглизларнинг, нима дедингиз?

- Италиянинг Corriere dello Sport ва испанларнинг El Mundo Deportivo газеталарида ёзилишича, “Рома” ярим ҳимоячиси Даниэле де Росси “Барселона”нинг энг асосий мақсадларидан бири экан ва катта эҳтимол билан бу трансфернинг амалга ошиши кутилмоқда. Олдин гапи чиқади, кейин...

- Англиядан “Ювентусга келиб, ўзини у қадар ёрқин кўрсата олмаган Улоф Мельберг Грециянинг “Олимпиакос” клуби билан 3 йилга шартнома имзолади.

- Рикардо Карвальюнинг “Интер”га кетиши аниққа ўхшаб қолди. Зеро “Челси” яна бир португалиялик ҳимоячи Бруно Алвешни қўлга киритишга яқин турибди. Трансфернинг таҳминий суммаси 24 миллион еврони ташкил қилади.

- “Милан” Алешандро Патони 45 миллион еврога “Челси”га сотишни истамагач, лондонликлар бироз бошқачароқ таклиф билан чиқишди. Энди улар 15 миллионга қўшиб, Дидье Дрогбани ҳам бермоқчилар. Озгина қўшинг, Роман ака!

- Фабио Гроссо Италияга қайтмоқда. ЖЧ-2006 қаҳрамонларидан бири “Ювентус” сафидан жой олишга яқин турибди. Давид Трезиге эса тескари йўналишда ҳаракатланиши мумкин. Бу борада келишув жараёни бошлаб юборилган.

- “Челси”да барча нарса қаноатлантиришини айтиб ўтган Майкл Эссьен “Реал” ва “Барселона” томонидан бўлаётган қизиқишларга бефарқ эмаслигини айтиб ўтди ва таклиф ёқса Испания ўйнаш нияти борлигини яширмади. Ўзи “Реал” Макелеленинг уволига қолганди, шунга ўхшатвордимикин.

- “Реал” раҳбари Флорентино Перес Роналдуни сотиб олмоқчи бўлганлар учун 1 миллиард евро нарх белгилади. Албатта бу футболчининг сотилмаслигидан далолат, аммо эви билан-да энди. Бир миллиардмиш-а!

- Ёзнинг бошида бизни куттириб, Тошкентга келмаган Дзеко “Милан”га ўтиши мумкин. Футболчининг айтишича, у шу кунларда “Милан” билан музокарага киришади.

- Флоран Малуда “Челси” билан шартномасини яна уч йилга узайтирди.

- Ўтган мавсумда “Реал” сафида 24 учрашувда майдонга тушиб, иккита гол киритган аргентиналик ҳимоячи Габриел Хайнце Англияга қайтишга қарши эмас. “Реал”нинг янги режаларидан тушиб қолган футболчига “Ливерпуль”, “Челси”, “Манчестер Сити” ва “Тоттенхэм”лар харидор бўлишмоқда.

- “МЮ” дарвозабони Бен Фостер клуб билан 4 йилга янги шартномага имзо чекди. Фергюсон ёши ўтиб бораётган Эдвин ван дер Сарга ўринбосар сифатида айнан Бенни кўряпти шекилли. Дарвоқе, “МЮ” “Реал”дан Касильясни сотиб олиш нияти ҳам борлигини маълум қилганди.

- “Милан” Гагога қизиқиш билдирмоқда. Балки “Челси” қаттиқ “ёпишиб” олган Андреа Пирлога ўринбосар сифатида қарашаётгандир миланликлар. Бу футболми ё олди-сотдими тушунмайсан киши...

- Андрей Шевченко “Рома”нинг ўзига бўлган қизиқишидан хурсанд эканлигини ва жиддий таклиф бўлса ўйлаб кўришини айтиб ўтди. Спалетти ва Тоттилар билан бир жамоада бўлиш Андрейга ёқар экан.

- “МЮ” томонидан икки йилдан бери кўз остига олинган Карем Бензема бу сафар ҳам “Лион”да қолмоқчи эканлигини маълум қилган. Унинг агентининг айтишича, футболчининг бор эътибори ЖЧ га қаратилган ва бу орада клуб алмаштирмоқчи эмас. Нархини оширяпти, шекилли.

- Самэюл Это'О сотилиши мумкинлиги ҳақида хабар тарқалиши биланоқ “Манчестер Сити” вакиллари камерунлик футболчи билан музокарага киришди. Шунингдек, Алекс Фергюсон ҳам ҳужумчини ўз жамоасида кўришгша қарши эмаслигини қистириб қўйди. Бозорни бузиш йўқ-да, Ферги амаки!

- “Порстмут” ва Англия терма жамоаси ҳимоячиси Глен Жонсон “Ливерпуль” сафидан жой олди.