☻♥☺OSH☺♥☻ - Страница 2 - SHERLAR.UZ/FORUM/ O`ZBEKISTONDA 1 RAQAMLI FORUM

Medvedovga osh pishirgan o’zbek yigiti

Medvedevga osh pishirgan o’zbek yigiti Chustiy oshxonasi imgGazetada suhbatlar, odatda, mashhur insonlar bilan qilinadi. Mashhur bo'lish uchun kamida san'atkor, aktyor yoki siyosatchi bo'lishingiz kerak. Ammo ba'zan mashhurlarga yaqin yursangiz ham mashhur bo'lib ketishingiz mumkin ekan. Rossiya Prezidenti Dmitriy Medvedovga shaxsiy oshpazlik qilib, unga o'zbek palovini pishirib bergan vatandoshimiz Bahriddin Chustiy ana shunday mashhurlardan desak mubolag'a bo'lmas. Bu oshpaz yigit kim? Keling, e'tiboringizda shu vatandoshimiz bilan bo'lgan bir suhbatni havola etsak. Avvalo, Chustiy haqida qisqacha ma'lumot:
Bahriddin Chustiy (Najmiddinov) 1984-yil Namangan viloyatining Chust tumanida tug'ilgan. O'zbek Milliy taomlari oshpazi. Professional oshpaz sifatidagi faoliyatini 2007-yil Moskva restoranlaridan birida boshlagan.
Bugungi kunga qadar «Rublev» (Moskva), «Sharm el Sheyx» (Moskva), «Kabob markazi» (Toshkent), «Grand Kaskad» (Sochi) hamda Turkiyaning Alanya shahrida joylashgan «Tandir» o'zbek restoranida bosh oshpaz bo'lib ishlagan.
2010-yilda Moskvada bo'lib o'tgan «Halol Ekspo — 2010» ko'rgazmasida restoranlar yo'nalishi bo'yicha birinchi, barcha yo'nalishlar bo'yicha uchinchi o'rinni egallagan.
Sochida Rossiya Prezidenti Medvedevga o'zbek palovini tayyorlab, shaxsiy oshpazlik qilgan.
www.oshxona.uzsayti asoschisi. Internet, gazeta va jurnallarda o's retseptlari va suhbatlari bilan muntazam chiqib turadi.
O'zbekiston Oshpazlar Uyushmasi a'zosi.
- Chustiy taxallusi bilan tanilgan shoir borligini bilamiz. Osh pishirishni ham ijod desa bo'ladimi?
- Albatta. Pazandalik sohasida beqiyos xizmat va izlanishlar qilgan. Marhum ustoz Karim Mahmudov «Taom tayyorlash — ilmga asoslangan bir san'atdir» deganlar. Shuningdek, u kishi o'zlarining asarlaridan birida, «Mudom izlanishda, taom tayyorlashda yangiliklarga intilgan oshpazlarni ham ijodkor desa bo'lishi»ni bayon qilib o'tganlar.
- Nega Chustiy taxallusini tanlagansiz?
- Besh-olti yil muqaddam internet sahifalaridan birida ro'yxatdan o'tish uchun har hil nom (taxalluslar) yozib-o'chirib, oxiri kallamga, asli Chustlik bo'lganim bois, Chustiy nomi ostida ro'yxatdan o'tish fikri kelgan edi. Shundan beri shu taxallus bilan qoldim.
- Oshpazlik kasbiga qiziqish qanday paydo bo'lgan?
- O'zi aslida oshpaz bo'laman degan xayol kallamning bir chetida ham yo'q edi. To'g'ri, yoshligimda ham uyda har xil taomlar tayyorlar edim, hattoki maktablarda bo'ladigan har xil kechalarga pirog yoki biron bir pishiriq tayyorlash kerak bo'lganda, oyimning qo'llari band bo'lib qolsa, o'zimga ham, uka-singillarga ham o'zim tayyorlagan kunlarim ham bo'lgan.
Avvaliga bu sohani vaqtinchalik kasb deb qaragan edim, so'nggi 4-5 yil ichida esa bu kasbga mehr va qiziqish tobora ortib bordi va bormoqda.
- Bizning madaniyatda ovqat pishirish ayollarning ishi degan gap bor. Oshpaz erkak sifatida bunga qanday qaraysiz?
- Tog'ri, bu gap nafaqat bizning madaniyatda balki bo'shqa ko'plab xalqlarda ham uchrasa kerak. Darhaqiqat, pazandalik ayollarga xos, ammo o'sha nozik xilqat vakillarining pazandaligi, taomlari uyida, oilasi va yaqinlari uchundir, ya'ni kichik davralar uchun. Erkak oshpazlarning taomlari esa xalq orasida, ko'cha-kuyda, ya'ni katta davralar uchun hisoblanadi.
- O'zingiz ijod qilib kashf qilgan taomlaringiz bormi?
- Juda ko'p bo'lmasada, bor.
- Sevimli taomingiz nima?
- Norin.
- Qaysi taomni tayyorlashni yaxshi ko'rasiz?
- Milliy oshxonamizga oid deyarli hammasini, desam ham bo'laveradi.
- Restoranlarda, katta davralarda biror ovqatni o'xshatolmasdan buzib qo'ygan paytlaringiz bo'lganmi? Shunday bo'lib qolsa, nima qilasiz?
- Bunday holatlar deyarli har bir oshpazda kuzatiladigan hol, odatda ilk marotaba biron bir yangi taomni yoki shirinliklarni tayyorlaganda ko'ngildagidek chiqmaslik hollari ko'p kuzatiladi.